Hayu geura saradia
Meungpeung keur hirup di dunya
Amal keur sampeureun tea
Di ahir moal sulaya
Geuning maot ngadodoho
Boro sok dipoho-poho
Datangna teu mere nyaho
Ngageretek taya tempo
Taya beurang taya peuting
Taya raja taya kuring
Di mana ajal geus sumping
Teu meunang embung anaking
Horeng nyawa reujeung badan
Nu geus lila babarengan
Datang mangsa pipisahan
Paturay tineung pamitan
Lain meuran lain sugan
Da ieu mah kanyataan
Kabeh pasti ngarandapan
Geuning awak urang pisan
Kaget reuwas mata mencerong
Renghap ranjug munggah bengong
Napas ngangsek na genggerong
Nu deukeut geus teu katembong
Horeng ieu teh sakarat
Dicabut ku malaikat
Nyawa ngangsek mapay urat
Teu aya daya keur lumpat
Ku renghap nu panganggeusan
Pegat sakabeh harepan
Ngabengkang taya dayaan
Rek kumaha pangharepan
Boro mah keur suka bungah
Ngatur nafsu seuri bungah
Beak tempo kudu pindah
Nyampeurkeun ka alam barjah
Geus waktu ninggalkeun lembur
Menuju ke alam kubur
Meunang ngali geus diukur
Mahi keur awak sakujur
Rek naon anu di bawa
Duit loba sawah lega
Menang ngumpul-ngumpul tea
Belaan nipu pasea
Beunang tisusuk tidungdung
Nu sok dipake adigung
Kana sholat matak liwung
Waktuna jakat mah embung
Ibadah kateler-teler
Nepi ka nyanghulu ngaler
Lapur badan enggas komper
Di tengah imah ngagoler
Ngajolopong diruruban
Diriung ditarungguan
Geumpeur pacampur jeung reuwas
Setan mah bati mupuas
Harta anu ngunung-ngunung
Pakean duit satungtung
Ngan masih boeh asiwung
Ditambah kai keur padung
Lawang amal geus ditutup
Hanjakal keur waktu hirup
Talangke bet hanteu sanggup
Padahal waktu mah cukup
Paingan rosul ngelingan
Dunya mah pangumbaraan
Naha bet kamalinaan
Tonggoy hanteu nyubadanan
Ati ngerik pikir liwung
Imah tiiseun jeung suwung
Ngan anak yatim buruang
Singgarisik singrariung
Abong poe panganggeusan
Mana beurat rek amitan
Keun imah keun pakarangan
Geuwat keun logak ngantosan
Pasaran mendung dipayung
Ti luhur dirurub sarung
Nu ngiringna semu nguyung
Nangkeup dada singkuyungkung
Ngaleut ngeungkeuy ngabandaleut
Beuki deukeut beuki deukeut
Beuki deukeut beuki deukeut
Kana logak rupek heureut
Duh geuning enggeus nyangkorah
Rup ku padung rap ku lemah
Poek rupek jeung teu genah
Ngarumas cukireuh susah
Ahli sobat kawawuhan
Teu tolih gancang bubaran
Duh saha nu rek maturan
Geusan cicing babarengan
Mana sobat mana dulur
Geuning buriak salembur
Hanteu maturan di kubur
Sumawon nambahan umur
Oge harta banda kuring
Nu dipuhit buerang peuting
Cik mana anu rek ngaping
Geuning geus kieu mah kuring
Hanjakal aduh hanjakal
Teu getol sadia amal
Padahal geuning padahal
Ngan amal nu jadi bekel
Naon keur panyinglar sedih
Nahan ku cimata getih
Tawa bangkieung jungkelih
Harta mah geuning teu nolih
Enggeus montong rek sasambat
Teu guna enggeus kaliwat
Bongan bareto teu tho'at
Teu kurang nu nganasehat
Tong hantem hahanjakalan
Pan teu kurang nu ngelingan
Pek runggu jawab sorangan
Geura jawab pariksaan
Paremutan parantosan
Mangga geura aremutan
Sugan manawi jeung sugan
Ngajadi kamaslahatan
Ku maca ieu pepeling
Muga sing jadi panggeuing
Da Gusti anu ngajaring
Siang jeung wengi diaping
